DataLife Engine - Softnews Media Group

 Гауһар деген асыл тас жиһандағы

Махаббаттарың екеуіңнің болсын мәңгі.

Алақаныңа қонған құсыңды аялай біл,

Еш уақытта ренжітпе, Дүйсенғазы.

**************

Бажа, балдыз, күйеулер, туыстарым

Бақытты бол келешекте осы бәрің.

Дәм татсын деп бәріңді шақырып ем,

Жуайын деп жұбайымның жазылғанын.

Жанашырым жалғыз ұл, сүйген жарым,

Кім ойлаған бұлай боп ауырарын.

Жаның қалмай бәрің де жүгірдіңдер,

Осы отырған туыстар барлықтарың.

Ал айтарым тыңдасаң саған, жарым,

Ең керегі адамға зор денсаулық.

Жалғызыңның қызығын көрем десең

Алаңдамай еш нәрсеге жаныңды күт.

*************

Сіз сияқты бастық болса сенімді,

Бұлт баспайды мөлдіреген көгіңді.

Сіз бар кезде бізге тыныш, рахат,

Сіз отырған жерде бізге көңілді.

Ұжым болып құттықтаймыз бүгін біз,

Құтты болсын төл мереке күніңіз.

Бәрімізге ақыл-кеңес беретін,

Ұжымымыздың ұйтқысы боп жүріңіз!

Ұжымға Сіз тәрізді қамқор керек,
Сондықтан жақсы қыздар жиналды көп.
Тілектер айттық Сізге ұнасын деп,
Осылай көңілді жүр мұңайма тек.

Өзің ғой көпшілікке сән берген де
Дүниеде Сізге басшы тең келген бе?
Қоғамда Сіз бастаған көш алдында,
Қашанда табыламыз біз жаныңда.

Ұжымым деп бәйек болып жүресіз,

Татулыққа, ырзалыққа дәйек болып жүресіз.

Жұмысымыз оңға басса, көтеріліп көңіліңіз,

Бал-бұл жайнап, шаттанып бір күлесіз!

Сіз тұрғанда қамқоршы деп білеміз,

Көшбасшыға алаңдамай ереміз.

Аналық та, даналық та бойында

Басшымызға өзгелердің қызығарын білеміз.

Отбасында ата-анаға кіші қыз да өзіңіз,

Оттың басын ұйытатын анасы да өзіңіз.

Отағасы ата, Сіз ене боп атанып,

Құдалардың ортасында мерейленіп жүресіз.

Туған күнге құтты болсын айтамыз,

Тойды тойлап шат көңілмен қайтамыз.

Жасқа жастың қосылған жақсы ғой,

Тілегіміз қабыл болсын айтамыз!

*******

Құрметті қонақтар, қадірлі ағайын-туыстар!

 Бүгін біз үшін көңіл аса алабұртқан күн. Көңіл – қызымыз теңін тапты, отауын тігіп жатыр деп, қуаныштан шалқиды, көңіл – әлпештеп  өсірген қызымызды қимастықтан толқиды. Бұл – қыз ұзатқан әрбір ата-анаға тән, осында отырған талайыңыз бастан кешкен сезім. Осындай сәтте балаңның дүниеге келген кезінен бастап өмірде  өткеннің бәрі кино сияқты көз алдыңа келеді екен. Дүниеге ұрпақ келді деп ата-аналарымыздан бастап бәріміз қуанғанымыз, Қызылордадағы туыстарға сүйінші хабар айтқанымыз, баланың тәй-тәй басқаны, былдырлап сөйлегені, «ата», «әже», «мама», «папа» деген алғашқы сөздері ыстық, ортақ қуанышымыз болған еді.

Қазақтың салты бойынша алғашқы бала үлкендердікі саналады емес пе. Қызымыз екі жақтың – отағасының Қызылордадағы ата-анасының, Алматыдағы менің ата-анамның еркелеткен ортақ қыздары болды. Бүгінгі қуанышқа қатысып, міне, баталарын беріп отыр. Олардың енді шөбере сүйген қызықтарын көруін тілейміз.

Енді бірер сөзді құдаларға арнайын. Құдағи қызымызды өзінің қызындай қарсы алады деп сенгіміз келеді. Қызымыздың қадамы құтты болып, үйлеріңізге ырыс ала кірсін. Екі баламыздың қызықтарын бірге тойлап жүрейік, біз де ата-әже болайық.

Тойшы қауымға айтарымыз, келген қадамдарыңыз құтты болсын. Той сіздерге жұғысты болсын, ылғи тойда кездесіп жүрейік.   

*************

Қадірлі халайық, тойшы қауым, құда-жегжаттар, ағайын-туыстар!

 Адамның бір қызығы бала деген дана сөз бүгін бәріміздің басымызды тойда қосып отыр. Қызымыз өрісін тапты, құда-жегжатты болып жатырмыз деп анасы екеуміз қуансақ, немереміздің тойында отырмыз деп ата-аналарымыз қуанышты.

Ата-ана демекші, біз оқу бітірген соң Алматыда қызметке қалдық, қыздарымыз осында дүниеге келді. Менің ата-анам, туыстарым Қызылордада тұрды. Сондықтан қыздарымыз нағашы ата-әжелеріне жақын болып өсті. Балаларымыздың қамсыз өсуіне, өзіміздің алаңсыз қызмет етуімізге бұл кісілердің көмегі көп тиді, әлі тиіп келеді. Тілеуқорымыз. Ауылыңда қартың болса, жазылып қойған хатпен тең демекші, бүгінгі тойда үлкендердің отыруы той сәнін келтіріп тұр, ол кісілердің көретін қызығы көп болсын деп тілейміз.

Екі жасқа айтарым, біз бір баламыз екеу болды деп қуанып отырмыз. Әке жүрегі қимайды, қызғанады, алаңдайды, бірақ жастардың келешегі бақытты болады деген сенім бізді марқайтады. Адам ұрпағымен жасайды, ұрпақты болыңдар, айналайын.

Жастардың бақытты болуы ата-аналар бізге де көп байланысты. Татулық болса төбедегі келеді дегендей, бүгінгі тойды қалай қуанып бірге өткізіп отырсақ, қалған өмірде де қуанышымыз осындай ортақ бола берсін. Арамызда тек сыйластық, құрмет жүрсін. Жастарға үлгі деген осы.

Тойға келіп отырған ағайын-туыстарға, дос-жаранға, әріптестерге қуанышымызды бөліскендері үшін алғысымыз шексіз. Көптің тілегі көл деген, тілектеріңіз қабыл болсын, ағайын.

***********

Құрметті ағайын! Міне, желіп отырып, 60 деген белеске де келіп қалыппыз. Мен өзім пайғамбар жасы 63-ке келсем, артымнан ерген өкшелес інім бұл да 60-қа шығып отыр. Өткен өмір көз алдыңа кино болып елестейді екен. Ауылда бозбала болып қатар өстік, оқыдық, отау құрдық, өстік-өндік, талай елмен дәмдес болып, қызмет еттік. Әркім өзінің пешенесіне жазылғанды көріп келеді, Аллаға шүкір, жаман емеспіз деп ойлаймын. Осы аралықта дүние емес, дос жинауға, ағайынмен аралас болуға ұмтылдық. Міне, інім жиған байлығын көрсетіп отыр. Ол байлығы: ұйыған отбасы – келін, балалар, өсіп-өнген ұрпақ, осы тойға жиналған қауым, ағайын, дос-жаран. Солардың ортасындағы абырой. Байлық деген осы. Бақыт деген осы. Бір күн дәмдеске қырық күн сәлем деген. Тойға алыстан – Атыраудан, Астанадан және басқа да жерлерден ағайын-туыстар, құда-жекжаттар, дос-жарандар, қызметтес жолдас-жоралар қатысып отыр.

Үлкендердің батасын алған, Құдайдың рахметіне жолығар деген ұлағатты сөз бар. Сіздердің тілектеріңіз ініме, оның ұрпағына жұғысты болсын.

Қуанғаның рас болса, шақырған тойына бар деген осы. Жер қашық демей, қыстың көзі қырау демей жиналып отырмыз.

Ініме, бала-шағасына, баршаңызға дүниенің бар жақсылығын тілейміз. Еңбек жемісін, бала-шағаларыңыздың рахатын көріңіздер. Көргеніміз той болсын. Басымыз тойда қосылып жүрсін. Рахмет.

*************

Өлеңі мен әні Мұхтар Шахановтікі

Тойыңа гүл алып,

Келіп ем қуанып,

Қарсы алдың күлімдеп, көктемдей.

Жүзіңе нұр толып,

Кетіпсің құлпырып,

Бір бақыт сәулесін сепкендей.

Қайырмасы:

Сен туған күн мерекеміз,

Ән бастайық, кел екеуміз.

Ұмытпа сен, құрбым,

Есте қалсын, мәңгі бұл күн.            2 рет

Құрметті ағайындар, қадірлі .............!

Сіздерді бүгінгі ұлы тойларыңызбен шын көңілімізбен құттықтаймыз. Мұхаммет пайғамбардың хадисінде мұсылман үшін ең ұлы той - сүндет тойы деген екен. Мұның мәнісі сірә, балғын жас бала ата-баба жолына түсті, мұсылмандық рухын сақтайды, дәстүрге адал болады деген ниетте жатса керек. Сондықтан бүгінгі ұлы тойларыңыз құтты болсын.

Бір кезде мұсылмандықтың қаймағы бұзылмай тұрған кезде баланы жастан демекші, сүндетке отырғызуға сондай зор мән берілген. Бүгін сіздер ата-аналық борыштарыңызды өтеп қана отырған жоқсыздар, балақайдың келешегін нұсқап та отырсыздар. Баламыз өскен кезде білімді азамат болсын, рухы қазақша, ділі мұсылманша болсын, халқын сүйген азамат болсын деген тілектеріңізді жұрт алдында паш етіп, той жасап отырсыздар. Осынау ізгі тілектеріңіз қабыл болсын, мұраттарыңызға жетіңіздер. Баламыз жеті жұрттың қамын ойлаған азамат, атаның ғана ұлы емес, елдің, халықтың перзенті болсын.  

**************

Демейін сегіз қырың енді ашылды,

Өзіңде қасиет көп жарасымды.

Жылдар салған әжімдер ешқашан да,

Ала алмас бойыңдағы бар асылды!

Көңілмен әлі талай демігерсің,

Келбетіңді түзеумен әбігерсің.

Елуде жаңа қылық шығарумен,

Жігіттерге әлі қыздай көрінерсің!!

Сезімге әлі талай бас ұрарсың,

Оны қалай жылдармен жасырарсың.

Мәуелі Жер-Анадан нәр алатын,

Бәйшешектей құлпырып ашыларсың!!!

*************