DataLife Engine - Softnews Media Group

Өмірдің артқан жүгіне,

Мойымапсың да сынбапсың.

Үңілем жүрек түбіне,

Шешуін іздеп жұмбақтың.

 

Жетсемші дедің тілекке,

Сая боп бізге қанатың.

Дау бар ма

Ана жүрекке,

Бала үшін

Бәйек болатын.

 

Бар жоқты білмей шалқыдық,

Бұла боп өстік еркелеп.

От пенен өртке шарпылып,

Ағарды шашың ертерек.

 

Қыздарың ұшты қияға.

Ұлың да қонды ұяға.

Екі ауыз сөзге сия ма,

Ерлігің ерен ұлы ана.

 

Шаттыққа толар шартарап,

Анашым барда жаны ізгі.

Барсаңда Мекке арқалап,

Өтелмес ана парызы.

 

Өн бойың-үлгі, өнеге,

Парасат табам,

Бақ табам.

Немере деген немене,

Сарқытың бар ма сақтаған?

 

Ардақты ана есімі,

Әлі алда өмір несібі.

Тойласын жүзді туажат,

Тербетіп бақыт бесігі.

Құда елуге толғанда

Сыйласып, сіз-біз десіп, сыр алысар,

Бақыт қой құдаң болса құрақ ұшар.

Құйғытып елу деген бір ақ боз ат,

Астынан алты қырдың қылаңытар.

 

Өмірдің бастайтұғын көшін керуен,

Көзіңнен ізгіліктің отын көрем.

Бір сенің шаңыңа да ілесе алмас,

Талайлар менменсіген төсін көрген.

 

Сүрінбей келе жатсың талай сыннан,

Жарқылдап, ажарыңа арай тұнған.

Құданың сыйластығы мың жылдық деп,

Дана сөз қалай ғана дәл айтылған.

 

Армандар жетелейді тым алысқа,

Жүре бер ел-жұртыңа құрақ ұш та.

Шаңыраққа шалқыған шаттық келіп,

Басымыз қосылсын тек қуанышқа.

 

Құдажан,

Азаматтың тарланы едің,

Ақмаңдай арулардың арманы едің.

О, құда, туған күнің құтты болсын,

Тойлайық құшағында туған елдің.

Қандай ыстық ана деген әркімге,

«Құлыным!» деп отыратын әр күнде.

Бәрімізге бесік жырын үйреткен,

Аналардың маңдай тері бар түнде.

Жүрегіңнің жылуын шашқанда ана,

Оранады шуаққа аспан-дала.

Қасиетін ананың түсінеді,

Адамшылық жолымен басқан ғана.

 

Ойлап кетсем отырып анашымды,

Бұтақ жайған бәйтерек пана сынды.

Жинаған соң бойыма бар асылды,

Өтіп жатыр өмірім жарасымды.

 

Алда барын ұмытпағын, жарығым,

Дос пейілін қабағынан танығын.

Ата-анасын сыйламаған – ақымақ,

Ешкімге де жасай алмай қайырым.

 

Ар аттама,

Иманыңды кірлетпе,

Жексұрын боп жеті атаңды тілдетпе.

Ары таза, арманы асқақ азамат,

Бөленеді қошемет пен құрметке.

 

Ұқ, мәнін,

Ақиқаттың ақ жолын шықпағанын.

Аруақтарды шығармасаң жадыңнан,

Онда, қалқам, кісілікті ұнатқаның.

Нағашыларға

Сол екеуден жеті-сегіз біз бармыз

Бәрі жиен, бәрі сізге бөтен бе?!

Бәрі жиен, бәрі сіздің қаныңыз,

Бәрі сіздің шашқан тұқым-тарыңыз.

 

 

Қыз балаға құттықтау тілек

 

Ерке қызым алтыным –

Көркі қазақ халқының!

Сен туғанда - қуанып,

Сен жүргенде балқыдым!

 

Білім болды қанатың,

Өсті ойың-санатың,

Құтты болсын жеңісің,

Жалындай бол жанатын.

 

Күн нұрындай жарық бол,

Бабалардай алып бол!

Ақ бұлақтай мөлдіре,

Жаңалыққа салып жол!

*******

 

Күнім, гүлім, айымсың,

Көктемдегі қайыңсың.

Тәй-тәй басып үлгермей,

Папа деуге дайынсың.

 

Алтын қызым – батырым,

Биік болсын шатырың.

Асыл қызым – Нұргүлім,

Айналайын, ақ гүлім!

******

 

Батыр да туған анадан, ақын да туған анадан,

Ананың биік тұғыры – анадан туған бар адам.

Пайғамбарымыз Мұхаммед ананы құрмет санаған,

Анаға мәңгі борыштар елдегі барлық дана адам

                                ******

Ақ сүтін беріп өсірген, бұзық болсам - кешірген,

Тілін алсам – айналған, күнәм болса - өшірген,

Ақ анашым, анашым, саған тәнті бала шын!

Мөлдір, кәусар бұлақсың, мен сүрінсем – жылапсың,

Шыңға шықсам – қуанып, мен құласам – құлапсың,

Ақ анашым, анашым, сендей бар ма жанашыр?

****

Нағашыларға

Қымбат болар туған жердің ағашы да,

Әркімнің жету керек бағасына.

Анамның ақ сүті үшін өмір бойы,

Бәріміз борыштымыз нағашыға!

                                       *****

Нағашыға

Алыс ауыл арасын

Жақын қылған нағашым,

Ақ көңілді баласын

Ақын қылған нағашым,

Нағашымның жаңасын

Іздесең қайдан табасың?

********

 Жиенге

Өсіп-өнер жұртыма,

Өріс болған жиенім.

Айқасқанда жауымен,

Жеңісті алған жиенім.

Елдігін де білемін,

Кеңдігін де білемін,

Тайма осы қалпыңнан

Өзіңе айтар тілегім.

Ағайынға қамқор, бауырға мейірімді, жайсаң да жайдарлы келінімізге әлемдегі бар жақсылықты, дүниенің шуағын, өмірдің жырын, жүрегіне Алланың нұрын тілейміз. Алла жолын  ақ, көңілін асқақ, жүрегін уайымсыз, арманын  айқын, мақсатын жарқын етсін.

                                                              ***

Отша лаула, сөнбегін,

Еш жамандық көрмегін.

Қосағыңмен қоса ағар,

Құтты болсын қадамың,

Келін болдың, қарағым.

Салтын ұста, ардақта,

Үлкен ата-бабаңның.

Ошақтан от кетпесін,

Үйіңнен көп кетпесін,

Адал болғын жарыңа,

Лаула, оттай, жалында!

Әумин!