Тұлпардай зула топ жарып,

Сәулесі түсер – бол жарық.

Бақыт кеп қонып басыңа,

Жамандық өтсін айналып.

Қиындықтардан ықпағын,

Туыңды қолдан жықпағын.

Мен үшін бақыт қашанда,

Бәйгеден озып шыққаның.

*****

Жалғыздың үні шыққан ба,

Сіңеді сағым бұлттарға.

Тірлікте тіреу болатын,

Достыққа жетер күш бар ма?

Үмітке сенім жалғасып,

Тіршілік үшін талпынып.

Келесің інім, алға асып,

Арманды қуып шарқ ұрып.

Жолыңнан жүрген жаңылма,

Кедергі болса кесіп өт.

Жаңғырып тұрсын жадында,

Ағалар айтқан өсиет!

Жете бер аңсап күткен тілегіңе,

Қылаудай дақ түспесін жүрегіңе.

Отанның, ел-жұртыңның мақтаны бол,

Алды бол қатарыңның бұл өмірде.

Себездеп алтын ара   жан-жағыңнан

Жанымды жебейді бір шуақты үміт,

Қалдың сен жүрегімді тұрақ қылып.

Түндегі шақырасын шамшырақтай,

Дәтіме келем сені қуат қылып.

Сұқтанып қарай берем күнде өзіңе,

Көңілді күй ойнатып күмбезіне.

Жанарым қарағанда тайқып кетіп,

Қаймығам қарағандай күн көзіне.

Тамсанып сұлулыққа, сүзілемін,

Қиығы қызғалдақтың - қызыл ерін.

Жүргенде жүз қызға да ырық бермей,

Дауылдай тынышымды бұзып едің.

Толқытып тұнық сезім еркім кетті,

Түңлігін үміт көңіл желпілдетті.

Жүрегім қаяу тартқан қайта түлеп,

Сүйгенде сені ғана серпілмекші.

Дәл сендей көргенім жоқ шын асылды,

Қылығың, мінезің де ұнасымды.

Өзіңнен мұратымды тапқандаймын,

Кеудеме махабаттың гүлі ашылды!

Бәсеке өмір дегенің,

Алды бол сол бір жарыстың.

Мәреден сені көрейін,

Туын тік, балам, намыстың.

Жақсыға көңіл марқайған,

Жұлдызға қолың соз, балам.

Суырыла озғын ортаңнан,

Сөнбес отың маздаған.

Көгере берсін көсегең,

Жабысқын арман жалына.

Құлының жақсы десе мен,

Биіктей түсем тағы да.

Үмітім сенсің ертеңгі,

Сенімнің жықпа жалауын.

Өмірдің өзі өлшеулі,

Байқап біл бәрін, қарағым.

Марқайсын ата-анаң да,

Мақтансын жолдас-жораң да.

Пайдаңды тигіз адамға,

Пайдаңды тигіз қоғамға.

Көктегі жасын тәрізді,

Жарқ ете білгін, ұқтың ба?

Тәлкекке салып әлсізді,

Бас иген өмір мықты ұлға.

Шақырып асқақ арман, дулы дүрмек,

Жүресіз жүректерден жылу іздеп.

Алатау – арқа сүйер ағамызсыз,

Жалғайтын жолыңызды ініңіз көп.

Ізетті қалпынан еш өзгермеген,

Инабатты, көлденең сөзге ермеген.

Жақсылық жасадым деп дандайсымас,

Бәрінде парасатпен безбендеген.

Мәрт жүрек әспеттеген сырласын әр,

Қозғалмас тау қозғалса тұлғасы бар.

Өзіңдей көріп жұрттың барлығын да,

Жасауға бір жақсылық күнде асығар.

Дауырығып бостан босқа ісінбеген,

Өзгеге көлеңкесін түсірмеген.

Адамсыз шен-шекпенге қызықпаған,

Әр сөзің дәлелденген ісіңменен.

Бүкіл жұрт мәрттігіңді қылған аңыз,

Алтынмен жазылыпты жылнамаңыз.

Құрметтеп, хан көтеріп төбемізге,

Ағажан, өзіңізден үлгі аламыз.

Қалды артта

Жетпіс асу, қия шыңдар,

Сырбазсың, мінезіңде ұнасың бар.

Шұғыла шуақ төктің, айналаңа,

Жас жігіттей әлі де қуатың бар.

Жария боп жақсы атың алты Алашқа,

Жақсының көкірегі-жақұт қойма,

Көпшілік келді бүгін алтын тойға.

Жұптасқан

Тату-тәтті жарты ғасыр,

Өнеге ап,

Сыйластықтың салтын ойла.

Әлі де Жібек пен Төлегендей,

Көңілді көрікті ойға бөлегендей.

Қоныпты ұл-ұяға,

Қыз-қияға,

Жар болып, Алла өзі жебегендей.

Дәулет пен қонақтапты бақ төріңе,      

Куәміз шалқып – тасқан сәттеріңе.

Алтын той,

Сапар шегіп өткен шаққа,

Жолықтырған секілді жас кезіңе.

Өсірдің әдепті қыз, саналы ұлды,

Тек шаттық көнсін шырай ажарыңды.

Елу жыл бір-бірімен шәй деспеген,

Сыйластық сіздердегі болады үлгі.

Келеді жыр сыйлағым, гүл сыйлағым,

Жанымның жайып салып тылсымдарын.

Махаббат боп маздаған мына ғалам,

Бақытты жанұяның білсін барын.

Кеткен бе ширек ғасыр жылжып өтіп,

Қуантты қызғалдақтай ұл-қыз өсіп.

Ағамыз алақанда аялауда,

Ақ гүлдей асыл жарын үлбіретіп.

Қабағынан түсініп ер көңілін,

Жабырқатқан кезі жоқ жансерігін.

Жеңгеміз жиырма бес жыл болды бәйек,

Ағаның көтерумен еркелегін.

Ассақ та тіршілктің сан асуын,

Таусылмас арманы адам баласының.

Күмбірлі күміс тойлар айғақтайды,

Жүрек пен жүректердің жарасымын.

Жылжыған бұл уақытта дауа бар ма,

Жетелеп бара жатыр заман алға.

Ақ босаға есігін имене ашқан,

Күміс той жас дәуренді салады ойға.

Алда әлі думандатар сайран көп күн,

Күлімдеп күміс тойға жайнап жеттің.

Күміс той – алтын тойға есік ашып,

Күндерің шалқып-тасып тоймен өтсін.

Өрісің кеңіп үй болдың,

Ие боп жаңа пәтерге.

Құлпырып тұр ғой көңілің,

Жуылғандай ақ нөсерге.

Шаттана ұстап кілтіңді,

Шалқайдың, досым, шат күліп.

Ұмыт боп күндер былтырғы,

Жұлдыз боп жанды тәтті үміт.

Көңіліңе күй күмбірі,

Жарың да жайраң қағады.

Түзелер енді тірлігің,

Қуанттың бала-шағаны.

Баспана болмай күйде жоқ,

Қажытар кісі есігі.

Дос-жаран тұрсын үйге кеп,

Тербетіп шаттық бесігін.

Көңілін тапқын көршінің,

Туыстай болар жұптассаң.

Қанатты қаққын серпіліп,

Еркің бар енді бассаң.

Өркендей берсін өренің,

Естіліп «іңгә» - әсем үн.

Кеңісін керегелерің,

Құт әкеп жаңа пәтерің!