DataLife Engine - Softnews Media Group

Әскерге кеткенде

Жолыңды Алла қолдасын,

Жаманшылық болмасын.

Серті мен сөзде тұратын,

Сенімді болсын жолдасың.

Жолыңды кесем дегендер

Ешқашанда оңбасын.

Сәтті болып істерің,

Жақсы болып түстерің,

Жортып бір жортып жеткенде,

Жомарт болып төсегің.

Жұғымды болсын ішкенің,

Көрмеген жерді көріп қайт.

Қайрылып сәлем беріп қайт.

Ырзығың сыртта шашылса,

Оны да түгел теріп қайт.

Айдарыңнан жел есіп.

Желіп барып, желіп қайт.

Бақ қосылып басыңа,

Дақ түспей ар мен ағыңа,

Сау-саламат өзіңмен,

Кездесейік тағы да.

                     Әумин

**********

Оң болсын, балам, сапарың,

Молықсын дәмің, татарың,

Туған елің тапсырған,

Парызын өте Отанның.

Барып келіп жатыр ғой,

Өзіңдей жастар – қатарың.

Халықтың сүйген тірегі,

Сом темірдей білекті,

Арыстандай жүректі,

Анаңның сүтін ақтай біл,

Бере гөр деп тілекті!

                       Әумин

**********

Иә, Құдайым!

Дәулетті бас берсін,

Бақытты ас берсін.

Ұлыстың ұлы күнінде!

Ұлың оңға қонсын.

Қызың қырға қонсын.

Малың өріске толсын,

Дәулетіңді асырсын,

Дұшпаның басылсын.

Менің берген бұл батам –

Ұлыс күнге сақтап жүрген сүр батам.

Мінгендерің балалар,

Жорға-жорға тай болсын,

Жорғалатып келгенге

Көптің көңілі жай болсын!

Ай жағыңа қарасаң,

Алтыннан терек орнасын

Айында келген мейманың,

Соған атын байласын.

Күн жағыңа қарасаң,

Күмістен терек орнасын.

Күнде келген мейманың,

Соған атын байласын.

Таң мезгілі болғанда,

Наурыз күні туғанда,

Боз тоғайдай шуылдап,

Бөденедей пырылдап,

Берекелі құт болып,

Қыдыр келіп дарығай!

Астыр-тастыр,

Жұлдыздармен жалғастыр,

Жақсылармен жалғастыр,

Жамандардан адастыр!

                               Әумин

**********

Ұлысың оң болсын,

Ақ мол болсын,

Қайда барса да жол болсын!

Ұлыс бақты болсын,

Төрт түлік ақты болсын!

Ұлыс береке берсін,

Бәле-жала жерге енсін!

                         Әумин

**********

Өркенің өссін,

Өрісің кеңейсін.

Ат жалын тартып мініп,

Халқыңның қамын жегейсің.

Тілеуіңді беріп,

Бағыңды ашсын.

Айналып келіп ай мен жыл,

Аман-есен көруге жазсын!

                                 Әумин

**********

Тәңірім жаздай берсін,

Жаздай берсе жазылып,

Көкірегінде иман оты маздай берсін,

Тәңірім күздей берсін,

Күздей берсе құтайып,

Риздығын маңдай термен іздей берсін.

Тәңірім қыстай берсін,

Қыстай берсе, қысылмай

Ынсаппенен тізгінің тең ұстай берсін.

Тәңірім көктемдей берсін,

Көктемде көктей өніп,

Талабың көкке өрлей берсін!

Тышқан жылы тыныштық бер,

Сиыр жылы ырыс-құт бер,

Барыс жылы мал-басымды өсір,

Қоян жылы жайлы қонысқа көшір.

Қоян жылы жұрттан жылу сұратпа,

Ұлу жылы ұл-қызымды жылатпа,

Жылқы жылы жеткізе гөр мұратқа.

                                           Әумин

**********

Азамат туы ар болар,

Әділдік соған нәр болар.

Жадыңа тұтсаң осыны,

Жақсылық саған жар болар.

Досына құшақ жайғанның

Қасының жолы тар болар.

Тілектен қазына жиғанның

Ошағы орны бар болар.

Ошақта отың маздасын,

Орныңнан ор қазбасын.

**********

Сүлейменнің тақытын берсін.

Қыдыр құсы қонсын қасыңа,

Бұлбұл құсы қонсын басыңа.

Жортқанда жолың болсын,

Жолдасың Қыдыр болсын.

Жоғары болсын жұлдызың,

Бақытты болсын ұл-қызың.

Ас иесі байысын,

Бар ойлаған арманың,

Жақсылыққа жайылсын.

**********

Қуаныштың тұрағы бол,

Ұлан істің бұлағы бол.

Мерекенің құрағы бол,

Мейірімнің шырағы бол.

Сабырлықтың сыңары бол,

Пәк үлгінің шынары бол.

Тұралықтың тұмары бол,

Тұлғалы ұлттың құмары бол.

                                   Әумин!

**********

Жақсы ұлың сүйенетін тау болсын,

Жақсы туыс қалқан менен бел болсын,

Тәңір сені жамандықтан жебесін,

Тірлігінде тұрлаусыз жан демесін.

                                            Әумин

**********

Бедері кеткен қамқадан

Берік тоқылған бөз артық.

Берекесіз туыстан,

Берік байласқан сөз артық.

Жақын деп жаманға қайырылма,

Жат деп жақсыдан айырылма.

Өгізді өрге сүйреме,

Қанат, қарың талар,

Қанат қарың талса,

Қарға-құзғын алар.

Жақыннан зиян қыл,

Алыстан пайда қыл,

Тышқан да інінен алыс жайылады,

Соны да есіңе ал.

Қайтып кірер есікті

Қатты жаппағайсың.

Ол кім десең – сүйек, жекжат.

«Су сүзілмейді, сүйек үзілмейді».

Осы айтқандарымды есіңе сақтасаң,

Ешкімнен қор болмайсың!

                                      Әумин

**********

Ханның  тақытын  берсін,

Халықтың қамын жесін деп.

Игі жақсының бақытын берсін,

Ынсаппен ғұмыр кешір деп.

 

Батырдың жүрегін берсін,

Шабынған жауды қусын деп.

Балуанның білегін берсін,

Тәуекелге белін бусын деп.

Бидің әділ төресін берсін,

Озбырдың құты қашсын деп.

Кәрінің ақыл кеңесін берсін,

Кәріптің көңілі тассын деп.

 

Шебердің қолын берсін,

Өнердің бағын ашсын деп.

Шешеннің жолын берсін,

Ұрпаққа үлгі шашсын деп.

 

Ғалымның данасын берсін,

Көкейге ілім қонсын деп.

Сабырлының санасын берсін,

Дүниені саралап берсін деп.

 

Бәйбішенің сабасын берсін,

Ырыздығы толсын деп.

Ақсақалдың тобасын берсін,

Еліне ұйытқы болсын деп.

 

Төренің тектілігін берсін,

Сүйек сындырмас бекзат болсын деп.

Құданың қамқорын берсін,

Жақсының жекжаты болсын деп.

 

Қыранның шәулісін берсін,

Қаққанда қиядан шалсын деп.

Тазының құмайын берсін,

Қапысыз аңын алсын деп.

 

Жүйріктің шаңдозын берсін,

Еліне олжа салсын деп.

Жігіттің жампозын берсін,

Атаның кегін алсын деп.

 

Алғанның аруын берсін,

Жардың көңілін тапсын деп.

Келіннің тәуірін берсін,

Ағайын, жұрқа жақсын деп.

 

Серінің сәнін берсін,

Салтанат, сұқбат құрсын деп.

Салдың салған әнін берсін,

Сауытқа ойнап-күлсін деп.

 

Молдананың азанын берсін,

Таупықпен тәубаға келсін деп.

Көпестің азабын берсін,

Алыс-жақынды аралап көрсін деп.

 

Байдың дәулетін берсін,

Молшылық құрса деп.

Үйіп-төгіп бәрін берсін,

Игілікке жұмса деп.

                                    Әумин

**********

Жас қосылсын жасыңа!

Оңға басса талабың,

Кеуіп босқа тасыма.

Тайып кетсе табаның,

Жүнжіп бекер жасыма,

Арам ойлы арсызбен

Бола көрме ашына.

Алды-артыңды ойламай

Іс қылмағай асыға.

Жолдас боп ер парықтап,

Жақсы адамның қасына.

Сонда жаның жай тауып,

Ас қосылсын асыңа,

Жас қосылсын жасыңа!

                                        Әумин

**********

Халқыңа жайлы бол,

Судай таза бол.

Желдей жүйрік болып,

Өмірің ұзақ болсын.

Аймағың суат болсын,

Сөзің халқыңа қуат болсын.

Халқыңның қалаулысы бол,

Балапандарыңның қорғаны бол!

                              Әумин

**********

Бүгінгідей ашық күн жайнай берсін көгімде,

Осы күннің астында гүлдей берсін елім де,

Жүрсін дәйім бақыт қана серік боп,

Тұрсын дәйім қуанышы көрік боп.

Ұлы өмірдің өзіндей жайнай берсін жасымыз,

Енді қайғы көрмесін ақ қыраулы басымыз.

Барлық халық тең болсын,

Бір-бірімен қуанышқа дос туысқан ел болсын.

Арандатқан адамды алауыздық жойылсын,

Мал-басымыз мол болып, ел ырысқа тойынсын.

Күніміз ұлысты болсын,

Жеріміз ырысты болсын.

Өрісіміз малға бай, дүбірлі болсын,

Келіндеріміз жанға бай, үбірлі-шүбірлі болсын.

Ер жігіттің ту етер ар-тұрағы,

Қанат беріп түлетер арғымағы болсын.

                                                 Әумин

**********

Е, Патша Құдайым, жарылқағанмен жандас ет,

Ораздымен оттас ет,

Кімді жарылқасаң, соның қасында ет,

Алдағы әзір, шүкір нәубет,

Астыр-тастыр,

Үзілістірмей ойластыр,

Жақсылармен жанастыр,

Жамандардан адастыр!

Дәулетің Зияда болсын,

Дұшпаның пиада болсын,

Құдайым тілегіңді берсін,

Тұсауыңды алсын!

Ерлердің дұғасы,

Жарандардың батасы,

Болмағай менің бұл батамның қатасы!

Тағы да бір Құдайым жарылқасын,

Иманың мен жасыңа Қыдыр дарысын!

Бата бер десеңіз бізге,

Бата бердің сізге.

Әрқашанда бізді

Той думаннан ізде.

Құдайым қуат беріп сізге,

Ұрындырмай күзге,

Жасыңызды жеткізсін жүзге.

Құдайым көктем берсін,

Көктем берсе – көптен берсін.

Құдайым жаздай берсін,

Жаздай берсе – жазбай берсін.

Құдайым күздей берсін,

Күздей берсе – үзбей берсін.

Құдайым қыстай берсін,

Қыстай берсе - қыспай берсін.

Құдайым көңіліңді жас қылсын.

Қастық ойлаған адам болса,

Құдайым састырсын,

Көңілін пәс қылсын.

Қас дұшпаның болса,

Қара таспен бастырсын.

Құдайым абыройыңды астырсын,

Берекеңді тастырсын.

                                Әумин

**********

Адамның күні бар ма сыналмаған,

Бақ тайса мал менен бас құралмаған.

Күніне тоқсан түрлі көрсең пәле

Сонда да күдер үзбе бір Алладан!

*******

Жігіттер, жаман істі әдет етпе,

Досыңды бірге жүрген басып өтпе.

Басыңа әлде қандай іс түскенде,

Дос түгіл дұшпаныңда қашар шетке.

 

Жігіттер мал мен басым көп демеңіз,

......

 

*******

Бұл дүниенің мысалы

Бұл дүниенің мысалы

Ұшып өткен құспен тең.

Өмірде көрген жақсылық

.....

Адамдық борышың –

Халқыңа еңбек қыл.

Ақ жолдан айнымай

Ар сақта, оны біл.

Талаптан да білім мен өнер үйрен,

Білімсіз,

Өнерсіз,

Болады ақыл тұл.

Мақтанға салынба

Мансаптың тағы үшін.

*******

Ғылым таппай мақтанба,

Орын таппай баптанба,

Құмарланып шаттанба,

Ойнап босқа күлуге.

Бес нәрседен қашық бол,

Бес нәрсеге асық бол.

Әуелде бір суық мұз – ақыл зерек,

Жылытқан тұла бойы ыстық жүрек.

Тоқтаулылық, қалыпты шыдамдылық

- Бұл қайраттан шығады, білсең керек.

********

Сенбе жұртқа, тұрса да қанша мақтап,

Әуре етеді ішіне қулық сақтап.

Өзіңе сен, өзіңді алып шығар,

Еңбегің мен ақылың екі жақтан.

*******

Әсемпаз болма әрнеге,

Өнерпаз болсаң арқалан.

Сен де бір кірпіш дүниеге

Кетігін тап та бар қалан.

**********

Мен боламын демеңдер

Аяқты алшаң басқанға.

Екі көзің аларып,

Құр қарайсың аспанға.

*************

...Мекен берген, халық қылған Ол – ләмәкен.

Түп Иесін көксемей бола ма екен?

Және Оған қайтпақсың, оны ойламай.

Өзге мақсат ақылға тола ма екен?

*********

Адам – бір боқ көтерген боқтың қабы,

Боқтан сасық боласың өлсең тағы.

Мені мен сен тең бе деп мақтанасың,

Білімсіздік белгісі – ол баяғы.

Өлейін деп өлмейді өлерлік жан,

Әсте өлмесін білгендей қылық қылған.

Ажал келіп бас салса, жанды ұрласа,

Өмір қайда, сен қайда, соны да ойлан.

 

Адамзат – бүгін адам, ертең топырақ,

*******

Бірінші тілек тілеңіз:

Бір Аллаға жазбасқа.

Екінші тілек тілеңіз:

Әзәзіл, пысық, залымның

Тіліне еріп азбасқа.

Үшінші тілек тілеңіз:

Үшкіліксіз көйлек кимеске.

Төртінші тілек тілеңіз:

Төрде төсек тартып жатпасқа.

Бесінші тілек тілеңіз:

Бес уақытқы бес намаз

Біреуі қаза қалмасқа.

Алтыншы тілек тілеңіз:

**************

Қосылып тұрған қос ұлан,

Игілікті, алаулы болыңдар.

Халыққа қалаулы болыңдар.

Өмір бойы біріңді-бірің

Жамандыққа қимаңдар.

Мейірбанды махаббатпен,

Үлкендерді сыйлаңдар!

***********

Табыстары көп болсын,

Алақандары ашық болсын,

Өмірге машық болсын!

Күйбең қағып кейін қалмай,

Жаңалыққа ғашық болсын,

Ұрпақтары ер болсын,

Кемеңгерлермен тең болсын.

********

Жас баланың күлкісін бер,

Жас ананың ұйқысын бер,

Жомарттың жолын бер,

Қыздың қылығын бер,

Судың тұнығын бер,

Асаудың арынын бер,

Түнгі оттың жарығын бер,

Даланың жазықтығын бер,

Гүлдің нәзіктігін бер,

Теңіздің тереңдігін бер,

Лашынның жүрегін бер,

Нағыз достың тілегін бер,

Мәңгі бақи ажырамас

Шын ғашықтың білегін бер!

***********

Әумин – деп қолың жай,

Мен бір бата берейін.

Бергенде бата не дейін:

Әуелі Құдай оңдасын,

Малың менен басыңа

Еш жамандық болмасын.

Берекелі бақ қонып,

Бірдей өссін мал-басың,

Несібең артып күн сайын,

Өзегің ешбір талмасын.

Жаратқан жаббар жар болып,

Пендеге күнің салмасын!

Жаратушы құдірет,

Жарылқаудың қамын ет,

Зылиқа мен Жүсіптей, ет!

***********

Талдай бой берсін,

Сұңғыла ой берсін,

Жаздай жамал берсін,

Қарадай жанар берсін!

Анаға қуат болсын,

Ағаға шуақ болсын,

Нәзік жаны болсын,

Елінің ары болсын,

Басына өнердің бағы қонсын,

Ақ орданың шамы болсын,

Ата-анасының сәні болсын!