DataLife Engine - Softnews Media Group

Тілімде менің

Байлығы жатыр ғаламның,

Тілімде менің

Кендігі жатыр даламның

Қаныма сіңген,

Жаныма сіңген сүтімен

Мейірім менен

Махаббаты жатыр Анамның!

 

Тілімде менің –

Бабамның батырлығы да,

Махамбет пенен Абайдың ақындығы да.

Дүниеге келе айқайды салған іңгәлап,

Тілімде менің сәбидің батылдығы да.

 

Тілімде менің –

Иірімі күй мен жырдың да,

Тілімде менің –

Сайрайды тынбай бұлбұл да.

Тілімде менің

Бұрқырап жатқан гүлдер мен

Жөргектің иісі,

Жусанның иісі, қырдың да.

 

Найзағайлардың

Жарқылы да бар тілімде,

Қарындардың

Шаңқылы да бар тілімде.

Аққулардың

Сұңқылы да бар тілімде,

Қаз біткеннің

Қаңқылы да бар тілімде.

 

Биіктік те бар,

Тереңдікте бар тілімде,

Байтақтық та,

Шалқарлық та бар тілімде,

Асқақтық та бар,

Алғырлық та бар тілімде,

Биязылық та бар

Ибалық та бар тілімде.

 

Мәрттігім де бар,

Пәктігім де бар тілімде,

Тұлпарлық та бар,

Сұңқарлық та бар тілім де.

Оттылық та бар,

Тектілік те бар тілімде,

Шешендік те бар,

Көсемдік те бар тілімде!»...