DataLife Engine - Softnews Media Group

Кетермін, артымда сөз, әнім қалар   /aigul0388 қосқан

Шәкәрім

Кетермін, артымда сөз, әнім қалар,
Кейінгі жастар оқып ортаға алар.
Бірі - жөн, бірі - теріс айтыпты деп,
Таласып өздерінше сынға салар.

Метки к статье: Кетермін, артымда сөз, әнім қалар

Еріншектің ертеңі ғұмыры бітпес,

Ал ғұмыры ертең-ақ бітер.

***             ***             ***

Қорқақ қорқа-қорқа батыр болар,

Не болмаса қатын болар.

***             ***             ***

Ақыл да, ақын да, батыр да бұқарадан шығады.

Елбасы да, шенбасы да бұқарадан ығады.

***             ***             ***

Білімді ел - Отан болар,

Білімсіз ел қотан болар.

***             ***             ***

Уәде берілсе неғұрлым ерте,

Ғұмыры да болады соғұрлым келте.

***             ***             ***

Көңілің толмаса заманға,

Кінә қойма адамға.

Адам билік етпейді,

Уақыт деген тажалға.

***             ***             ***

Бұрын өлгендер бір уыс топырақты қанағат қылса, қазіргі өлгендер бір Камаз топыраққа да қанағат етпейді.

***   ***             ***

Тәннің кірін жуып тазартасың

Жанның кірін қайтіп тазартасың.

***             ***             ***

Келеді кейде ойлар қайдағы жоқ,

Кететін кейде аса пайдалы боп.

***             ***             ***

Жақсы ойдан не пайда,

Жарамаса әжетке.

Жаратам деп жеті ойла,

Жақсы ойды қажетке.

***             ***             ***

Көп ойдан жоқ ешбір пайда,

Екі ойың болса біреуін таңда.

***             ***             ***

 

 

Көп сөздің көпшілік түсінбес парқын,

Аз сөздің әрқашан қымбат қой нарқы.

****           ****           ****

Көп сөзден гөрі салмағы жеңіл,

Бір ауыр сөздің бағасы алтын.

Көп жерде сол бір бағалы сөзді,

Болады екен айтпаған артық.

****           ****           ****

Ой көп болса бірін-бірі түртеді,

Ой аз болса бір-бірінен үркеді.

****           ****           ****

Мақтаншақ болсаң жарылып кетесің,

Сабырлы болсаң мақсатқа жетесің.

Әсемпаз болсаң әуреге жолығасың,

Өнерпаз болсаң сәулеге жолығасың.

****           ****           ****

Күдікті секіреді,

Сенімді кекіреді.

****           ****           ****

Жорыққа шықсаң жолдасың сенімді болсын,

Торға түссең де қорықпайсың.

Өзіңде жоқ болса да еліңде бар болсын,

Ешқашанда торықпайсың.

****           ****           ****

Мақсатың біреу болса,

Төрт жерден тіреу болсын.

Дені сау сомдай білегің,

Ақылға толы жүрегің.

Күш-қайрат пен жігерің,

Осылар болар тірегің!

****           ****           ****

Уақытым аз дегендер,

Көрінcе де кемеңгер.

Өзінің емес өзгенің,

Уақытын жегендер.

****           ****           ****

Мақсатың биік шығар тауың,

Қиялың ең қауіпті жауың.

Мақсатың қатты еліктіреді,

Түбінде бақытқа кезіктіреді.

Қиялың қатты желіктіреді,

Түбінде пәлеге кезіктіреді.

****           ****           ****

Бидай ексең дұрыстап,

Қурай шығып кетпейді.

Бала өсірсең дұрыстап,

Алдыңнан қия өтпейді.

****           ****           ****

Бағаңды білсең арзанға келіспе,

Бағаңды білмесең босқа керіспе.

****           ****           ****

Қателеспейтін адамдардың түгел сияқты есебі,

Бәрібір олар болып жүр ғой басқалардың есегі.

****           ****           ****

Жақсы маман да аяғын қате басады,

Бірақ ісінен ләззат ала-алмай сасады.

****           ****           ****

Кішкентайдан асырап едім бөлтірік,

Өскеннен соң өзімді қапты сол шірік.

Өзіме қарай шабатынын білгенде,

Күшік кезінде тастайтын едім өлтіріп.

****           ****           ****

Дүние жеткізбейді сағым құсап,

Әуре етер ер жігітті бағын тұсап.

Алдамшы дүниені қуған адам,

Кетеді ең соңында жарым құсап.

Шын достық ескірмейтін жалын құшақ,

Достармен жүрген кезің жалынды шақ.

Туған жер, ата-анаң бар асылың,

Қадірле осыларды барыңды сап.

****           ****           ****

Арақ аздырады, өз көріңді өзіңе қаздырады,

Темекі тоздырады, кеудеңде құртты қоздырады.

Байлық мас қылады, адамдармен қас қылады,

Өнер мен Білім,

Тілің мен Дінің барлығынан оздырады.

 

 

Пенделіктен биік адам

Бәрінен де биік!

 

Күлімдесе, күлімде!

Түсі игіден түңілме!

 

Ақиқатпен айтыспа,

Абырой алмайсың!

 

Таң атпай тұрған

Ауаны Тәңірімен қатар жұтады.

 

Қамшы бас жарады,

Тамшы тас жарады.

 

Елдің еркесі болу оңай,

Серкесі болу қиын.

 

Елге еңбегің сіңбесе,

Еркелейсің кімге сен?!

 

Өмір - әңгүдік,

Өнер – мәңгілік.

 

Сөзбе- сөз аудара салу аз,

Әдеміні әдемірек қылып,

Құдіретті құдіреттірек қылып аудару керек.

 

Жаужүректі Жаратқан жебейді.

 

Қасыңның айтқанына да құлақ түр.

 

Алтын арандатады.

 

Бәрін де бүгінге бейімде,

Қалдырма кейінге!

 

Бұзылар күлкің,

Бұзылар құлқың.

Түбінде жетер,

Түбіңе құлқың!

 

Тентекке тән – ұрыну,

Тұлпарға тән сүріну.

 

Ұшсаң қиядан ұш,

Ішсең қайнардан іш!

 

Ұмытсаң ұмыт өлімді,

Ұмытпа бірақ тегіңді!

 

Етікшіні ақыл-ойы

Етікшінің бойындай болу тиіс пе?!

 

Әр жердің өз өсімдігі,

Әр батырдың өз осалдығы бар.

 

Арқан екі рет есілмейді,

Бір күнәға екі жаза кесілмейді.

 

Үміт – түлкінің құйрығы,

Қиял – күлкінің жүйрігі.

 

Біреудің күні батқаны –

Біреудің таңы атқаны.

 

Пенденің бүкіл байлығы,

Парасат пен махаббат қана.

 

Дүние күйіп кетсе де,

Күнәлі жазасын тартуға тиіс.

 

Өсекті елден бұрын тарататын

Өмірем қапқыр кісілер.

 

Әділетсіздер қабілетсіздерден шығады.

 

Дарынды желеп-жебеген,

Құдайдың қолын демеген.

 

Әдеттерімен анайы

Күлкі болмай ма ағайын?!

 

Қабілетті қызмет етсін,

Әділет билесін!

 

Ғашық болсаң, жырақ емес жырағың,

Бір әніңе жалғасады бір әнің!

 

Мүмкіндіктің бірі жоқ та, бірі бар,

Айлы түнде ұнатпайды ұрылар.

 

Мұзбен жүрсең бәрін ұлтан шешеді.

Зар боласың қара жолға кешегі.

 

Жау шабады ойда жоқта,

Жау шабады бір түнде.

Қашқан емес ерің түгіл,

Елін тастап итің де!

 

Жолбарыстың ізі қалмайды,

Жаңбыр құртының ізі қалмайды.

 

Тарсыл-гүрсілден басың қатады,

Тыныштықты жаның қалайды.

 

Біреу емес,

Он қызың бар.

Бірақ та –

Ұл күтесің

Жеткізер деп мұратқа!

 

Бармақтай бақ,

Бармақтай бақ!

Сол болса....

Сүйемейді асқар тау да,

Ақша тауың болмаса!

 

Адамға - есім,

Ағашқа өсім керек!

 

Ақыл – дұрыс нәрсе,

Бірақ ол – бақыт емес!

 

Кедейлік те сын,

Байлық та сын.

Біреуі – аздырады,

Біреуі – бұзады!

 

Ойла да ойна!

Ойна да ойла!

Озып та кетпе,

Қалып та қойма!

 

Ақымақтар бар бір айтқаны келмесе,

Бір айтқаны келеді.

Бірақ өзіне-өзі ырза болып өледі.

 

Сөздің иесіне сенбе,

Жүйесіне сен!

 

Қазанаттың қадірін азамат,

Азаматтың қадірін ел біледі.

 

Елдің көсемі дұрыс болса,

Есебі дұрыс болады.

 

Түзу жол уақыт алмайды.

 

Күн қуанып шығады,

Ұялып батады.

Бәріне кінәлі - адамдар!

 

Өкпе - екеу, бүйрек – екеу, көз – екеу,

Құлақ – екеу, аяқ – екеу, қол – екеу,

Тек жүрек жалғыз.

Жүрек екеу болғанда

Кез келген адамның екіге бөлініп кетуі мүмкін еді ғой.

 

Тірлікке біз сын көзімен қараймыз,

Тірлік бізге мұң көзімен қарайды.

 

Түннің өзі демалмайды,

Демалатын – ұлы еңбек!

 

Өмірдің мәні: көзің барда көру.

Алу емес – беру,

Жамандықтан жеру,

Жақсылыққа сену,

Көресіні көру.....

 

Асықпағын,

Саспағын!

Жаратпайды Жаратқан

Пенделердің астамын.

Ештеңе жоқ мәңгілік,

Өмір деген – қасқағым!

 

Көздің жасы кепкесін

Ақылды қыз...

Ұмытады өкпесін!

 

Шындық зарлап жылап тұр.

Жүрегіңе құлақ түр.

 

Ойлар – мидың азығы,

Ми – ойлаудың қазығы.

 

Ұғындыру мен жұмылдыру түбірлес.

 

Даналыққа толы кітапты ашпаған –

Қасиеттіге қарсы шығар хас надан.

 

Еңсерген теңселмейді,

Теңселген еңсермейді.

 

Көріктіліктің өзі де көптің көзінде кепілдемедей.

 

Жақсылық жар салмай-ақ өнегесін жаяды.

 

Әулекіні әулетіңнен аласта,

Сонда қамқор атанарсың Алашқа.

 

Түңілу –

Тұңғиыққа үңілу.

Үйде отырып сүріну,

Жерді құша жығылу.

 

Сыйынып жалбарынып,

Сұлулық тілеп алмассың.

 

Күле білмеген –

Өмір сүре білмейді.

 

Жады нашарлар жалған сөйлеп те жарытпас.

 

Ажарлы адам назарлы.

 

Сәтсіздіктің саты-саты сылтауы көп.

 

Мәңгілік – шексіз,

Кеңпейіл – кексіз.

 

Ойлаған озады,

Ойланбаған азады.

 

Ізгілікпен өбіс,

Мұратыңнан бөліс.

 

Арсыздық – апат етер қамсыздық.

 

Зерттей білген –

Жақсыны да, жаманды да таниды,

Танығаны қауымға да, өзіне де қайырлы.

 

Ойсыз еліктеу – желігу,

Абыройсыздыққа берілу.

 

Үйрену жолы әркімге әрқалай.

 

Бүгіннен сабақ алу –

Ертеңгі жаңалану.

 

Тіршілік жолы қимылда,

Мақсаттың басы пиғылда.

 

Адалдық – амандықтың төлқұжаты.

 

Ауыз жаласуды нағыз жарасу деп ойлама.

 

Сол құлағым тәуір,

Оң құлағым ауыр.

 

Даңғойды даурықпа деп таны.

 

Әділдерді әзәзіл әуреге салар.

 

Тәуекел таудан асырар,

Не құтыңды қашырар.

 

Шынайыны шындық деп таны.

 

Қайталап көшір,

Артығын өшір,

Қадірін өсір.

 

Кемеңгерлік – кемелге келгендік.

 

Тегеурінді, серпінді

Күйлер билер еркіңді.

 

Қастерлеп қайырылғанда ел дәстүрге,

Қыраны мен қырғиын теңдестірме.

 

Ардың тазалығы –

жанның мазалығы.

 

Бір елі биік ойлап кешегімнен,

Өзгеше рухтанып өсемін мен.

 

Ақыл-кеңес,

Сұрауың артық емес.

 

Сыпайы –

Сыпайының кетпес ұпайы.

Ойлағаныңыз тек оң болсын,
өйткені ойлағандарыңыз – сөздеріңіз болады.
Сөздеріңіз тек оң болсын,
өйткені сөздеріңіз – әрекетіңіз болады.
Әрекетіңіз тек оң болсын,
өйткені әрекетіңіз – әдетіңіз болады.
Әдеттеріңіз тек оң болсын,
өйткені әдетіңіз – құндылығыңыз болады.
Құндылығыңыз тек оң болсын,
өйткені құндылығыңыз – тағдырыңыз болады.

Метки к статье: ойлы сөздер, түйіндер