DataLife Engine - Softnews Media Group

Жақсы мен жаман туралы мақал-мәтелдер

Аузы жаман елді былғар,

Аяғы жаман көлді былғар.

 

Арғымақты жамандап, кәні, тұлпар тапқаның,

Ағайынды жамандап, кәні, туған тапқаның.

 

Жаман ат қамшыласаң өрге шаппас,

Жақсының жаман адам ебін таппас.

 

Жақсыдан тиер шапағат.

Жаманнан тиер кесапат.

 

Жақсы байқап сөйлер,

Жаман шайқап сөйлер.

 

Ештен кеш жақсы.

 

Жақсы – текшіл,

Жаман – кекшіл.

 

Жаман адамды жасауыл қойсаң, үстіңе жау келтірер.

 

Жақсыға ерсең жетерсің мұратқа,

Жаманға ерсең қаларсың ұятқа.

 

Жақсының қадірі өлгенде білінер,

Аттың қадірі мінгенде білінер.

 

Жаман сайға су түссе, өткел бермес өтуге,

Жаман адамға мал бітсе, сусын бермес ішуге.

 

Арық малды асырасаң, аузы-мұрның май болар,

Жаман адамды асырасаң, аузы-мұрның қан болар.

 

Жаман атқа жал бітсе, жанына торсық байлатпас,

Жаман адамға мал бітсе, қасына қоңсы қондырмас.

 

Жаманнан би қойма – кесім салады,

Залымнан қарыз алма - өсім салады.

 

Қарамықтың дәні болғанша, бидайдың сабаны бол.

Жаманның жақсысы болғанша, жақсы елдің жаманы бол.

 

Кедей үйді бойдағы билейді,

Жаман үйді қонағы билейді.

 

Жаманға жалынғанша,

Жат та жаныңды қарма.

 

Жемесе де май жақсы,

Бермесе де бай жақсы.

 

Жаман тонның биті ащы,

Жаман кісінің тілі ащы.

 

Жақсының алтын басы еңкейсе,

Білімсіздің басы шалқаяды.

 

Жақсы айғырдың үйірін ат жақтайды.

 

Жақсының жақсы білер сымбатын,

Жамандар қайдан білсін асылы мен қымбатын.

 

Жаман кісі мақтанса,

Жақсыны жағадан алдым дер.

 

Ауылыңда қария болса, жазып қойған хаттайын,

Алған жарың жақсы болса, ерттеп қойған ат дайын.

 

Жаман иттің атын «Бөрібасар» қояды.

 

Жақсы ит иесінің көз-құлағы.

 

Жақсы ит өлімтігін көрсетпес.

 

Жаңа айдан жақсылық.

 

Жақсы сөз жан сүйіндірер,

Жаман сөз жан күйіндірер.

 

Түйенің бурасы жақсы,

Сөздің турасы жақсы.

 

Жақсы бала – сүйік, жаман бала – күйік.

 

Адам аласынан сөз аласы жаман,

Оттың шаласына сөз таласы жаман.

 

Қонағы жаман болса, үй иесі қыдырады.

 

Ұлың өссе, ұлы жақсы мен ауылдас бол 

Қызың өссе,қызы жақсымен ауылдас бол.

 

Келінің жаман болса, ұлыңнан көр.

Күйеуің жаман болса, қызыңнан көр.

 

Жаман ауруға жақсы ас.

 

Ат жаманы – сүріншек, ет жаманы – шеміршек.

 

Жақсы адам елдің ырысы,

Жақсы сөз жанның тынысы.

 

Жаман аттан аяғым артық,

Жаман достан таяғым артық.

 

Жақсы ағаң - орман,

Жақсы інің – қорған.