Үш шынар

Анам, Әкем, Отаным – үш шынарым,

Үш шынарым, үш тұмар, үш бұлағым,

Сендерге арнап сайраудан танбас та едім,

Білсем барлық адам мен құстың әнін.

 

Кезімде мың тұрып, мың құлаған,

Жылуыңмен сендердің жүрмін аман:

Тал бесігін тербетіп, «Балапанын»

Әніменен ұйықтатқан бұлбұл – Анам.

 

«Шиыр жолға аласы, құласы бар

Тәуекел мен Үмітің ғана шыдар,

Елім аман болсын де» деп үйреткен

Сен едің ғой, сен, Әке, дара шынар!

 

Жұмағың да - ата-ана туған жері,

Екеуінің ақ отау тіккен жері.

Сол жұмағың – Отаным, ең биігім,

Тек сол жерде өмірім думан менің!