Кенен әндері

Кенен әндері                        

Келінжан

Құтты болсын, келінім, аяғыңнан,

Осы еді ғой күткенім баяғыдан.

Мал-мүлкіңе ие бол арнап жиған,

Өсекшілдің сақ болғай саяғынан.

 

Қайырмасы:

 

Қуанышым, жігер күшім, келінжаным,

Қуанышым, қайрат күшім, Көркемжаным.

 

Халқым тілеп әперген Көркем едің,

Көк желкеме көтерген еркем едің.

Мұңдар қубас атанып жүргенімде,

Елу беске келгенде көрген едім.

 

Қайырмасы:

 

Келін келді дегенде қуанғаным,

Үш ұмтылып орнымнан тұра алмадым.

Алғаныңмен қоса ағар, бақытты бол,

Құттықтаймын басыңның құралғанын.

 

Қайырмасы:

 

Тау ешкідей тау-тасқа аттап кетпе,

Кір жастықты басыма жастап кетпе.

Ауылыңда театр, кино жоқ деп,

Баламызды қалаға бастап кетпе.

 

Қайырмасы:

*******